Eh, Lissen up!
Lissen real good to dis multi-voice recording cuz goin speak to yoa heart an make you feel real good inside cuz da message a da bible goin come alive fo real kine.
Plenny peopo dat live Hawaii like know bout Jesus. But fo find out who him fo real kine, befo time dey get ony da English kine Bible fo read. Dat Bible use all kine hybolic kine language, not da kine language dat da regula peopo talk ery day. Dass why da translata guys wen make dis Bible fo da local kine Pidgin language. Get 29 local peopo dat talk Pidgin from small kid time dat translate um. Dey come from plenny diffren churches. From 1987 to 2020 some a dem work long time an oddas work short time. But all togedda dey make dis book fo da peopo dat talk Pidgin, fo erybody find out bout Jesus fo real kine. Had peopo from da Wycliffe Bible Translata guys dat help fo make shua eryting mean da same ting, jalike wat Moses, David, Isaiah, Matthew, Paul, an odda peopo wen write firs time in da Hebrew, Aramaic, o Greek language, dat layta come da Bible. Da Wycliffe guys work togedda wit some a da pastor guys from da local churches, an wit odda peopo dat get seminary o spesho kine study. Da main translata guys talk Pidgin all da time, cuz dey know da bestes way fo tell stuff fo all da local peopo undastan um.
Daily Dass why dis book da firs one dat give da local Hawaii Pidgin fo da whole Bible. Da team check eryting five o six time, an use all kine commentary books fo make shua da meaning stay clear. Dey use da heavy kine Pidgin from da countryside, cuz dis book fo da peopo dat talk Pidgin all da time an English ony litto bit. Dey da peopo dat use Pidgin fo all da importan kine stuff-like wen dey stay suffa, wen dey get good fun, o wen dey like talk bout how dey stay inside. But az not just da peopo from da countryside, dey da one dat use dis book. Odda folks like um too cuz stay mo clear fo dem. Dey use um fo:
· study da Bible
· youth group
· read to you
· read wit yoa kids
· help peopo dat get trouble
· teach
· help peopo fo know Jesus
· help Hawaii peopo dat livemainland fo no foget dea culcha
· an plenny mo kine stuff too.
